Hais Txog PAR
Participatory action research (PAR)
“Kev tshawb fawb” yog ib txoj hauj lwm tshawb nrhiav kom paub ntxiv txog ib yam dab tsi. Lub hom phiaj yog xav tau kev txawj ntse los txhim daws kho tej teeb meem nyob rau hauv ntiaj teb. Participatory Action Research (PAR) txhais tau hais tias “kev sib koom tes tshawb fawb kom tshwm sim ib txoj hau kev.” Nws lub hauv paus yog los ntawm txoj kev xav li no: Hauv ntiaj teb no muaj txhua txhua tus es txawj ntse. Tab sis cov tib neeg uas siv PAR ntseeg tau hais tias kev txawj ntse los ntawm cov xib fwb tshawb fawb nyob hauv tsev kawm ntawv qib siab thiab kev txawj ntse los ntawm neeg pej xeem muaj nuj nqis thiab tseem ceeb ib yam nkaus. Siv tau ib yam nkaus. Yog li no PAR thiaj li yog ib txoj kev tshawb fawb es caw neeg zej zog los koom tes nrog cov xib fwb tshawb fawb. Yam zoo tshaj yog neeg zej zog pab taw kev, pab tsim tswv yim, thiab pab khiav tej yam dej num tshawb fawb.
PAR yog ib yam kev koom tes tshawb fawb uas txawv ntawm cov kev tshawb fawb nyob hauv tsev kawm ntawv qib siab es yeej ib txwm tshawb fawb txog kev ncaj ncees. Txawv vim hais tias PAR koom tes nrog cov neeg zej zog uas raug cuam tshuam. Andrea Dyrness, ib tug kwv tshawb fawb, piav qhia hais tias “feem ntau yam kev tshawb fawb txog kev ncaj ncees xav hloov kev sib faib hwj chim” (Dyrness, 2011, p. 203). Tab sis yam kev tshawb fawb no nws tsuas hloov txoj kev siv kom ncaj ncees xwb, nws tsis hloov txoj kev tshawb fawb kiag—txhais tau hais tias cov neeg uas koom tes tshawb fawb ces yeej yog cov es ib txwm tshawb fawb xwb. Tsis hloov dab tsis li. Muab sib piv ces cov kev tshawb fawb uas siv PAR muaj ib qho kev xav hais tias “neeg zej zog kuj tsim tau tej yam kev paub kev txawj ntse es muaj txiaj ntsim rau txhua txoj kev tawm tsam, thiab tsis tas li ntawd los cov txheej txheem tshawb fawb yog ib yam uas pab hloov tau kev raug cuam tshuam” (p. 203). PAR lub hom phiaj yog ua kom cov txheej txheem tshawb fawb muaj kev ywj pheej thiab kev sib koom tes.
PAR pub ib txoj hau kev rau txhua leej txhua tus xav txog tej teeb meem tseem ceeb es tshuam nrog rau kev tsis ncaj ncees. PAR lub hom phiaj xav tuam ib tug choj kom cov kwv tshawb fawb hauv tsev kawm ntawv qib siab tau koom tes nrog cov zej zog nyog ib ncig. Michelle Fine (2018), ib tug kws tshawb fawb tshwj xeeb rau PAR, piav hais tias, “Zoo tib yam li kev ua yeeb yam, kev tshaj tawm, thiab kev tawm tsam, thaum muaj kev kub ntxhov, PAR yeem faib ib qho chaw rau sawv daws sib sau ua ke, sib pab, thiab sib koom tes” (p. 123).
PAR muaj ib txoj kev xav hais tias yeej ib txhia neeg xav soj ntsuam saib thiab tshawb fawb txog lawv tus kheej thiab lawv cov kev coj ua. Tom qab lawv paub me ntsis ntxiv txog lawv tus kheej lawm, lawv yuav siv tej yam kev txawj ntse no los hloov lawv lub neej kom zoo dua. Yam kev tshawb fawb no tsis yog kwv tshawb fawb tsim los daws teeb meem rau neeg pej xeem zej zog, tab sis yog kwv tshawb fawb txhawb neeg zej zog kom lawv pab tau lawv tus kheej. Txoj kev txhawb no yog los ntawm kev pab qhia txog txheej txheem kev tshawb fawb thiab faib kev pab kom txhua es neeg zej zog mam li kawm txog lawv tus kheej. Thaum lawv tshawb fawb txaus txog lawv tus kheej lawm lawv mam li “hloov lawv txoj kev coj kev ua nyob ib ncig ntawm no” (McTaggart et al., 2017, p. 28). Tej yam hauj lwm es siv PAR muaj kev xav hais tias, “hauj lwm tshwm sim ncaj nraim rau ib qho chaw thiab ncaj nraim rau ib lub sij hawm—tsis yog hais tias yuav tshwm sim rau txhua txhia lub sij hawm thiab txhua txhia qhov chaw” (p. 28). Tej yam kev tshawb fawb es siv PAR yeej muaj ntau txoj kev tshawb kev nhriav nthuav tawm. Tsis tas li ntawd los yam kev kawm kev txawj ntse yuav muaj faib rau sawv daws siv.
Raws li cov kws tshawb fawb es siv PAR tau sau tseg, cov hauj lwm no siv sij hawm, thiab cov txheej txheem feem ntau yus tsis paub hais tias thaum kawg yuav zoo li cas. Tej zaum tseem ua rau yus ntxhov siab thiab. Tsis tas li ntawd los tseem yuav muaj kev tsis sib haum xeeb txog kev nyiam kev txaus siab, tswv yim, thiab keeb neeg. Cov hauv paus ntsiab lus ntawm PAR txhawb pab kom txhua leej txhua tus sib koom tes tshawb fawb kom “muab kev tsis sib hauv xeeb nthuav tawm los sib tham txog, es tsis txhob cia zais vim txoj kev ntshai txhaum lwm tus” (Torre, 2009).
Saib daim video no yog xav kawm me ntsis ntxiv txog PAR thiab yog vim li cas PAR ho tseem ceeb
Dyrness, A. (2011). Mothers united: An immigrant struggle for socially just education. University of Minnesota Press.
Fine, M. (2018). Just research in contentious times: Widening the methodological imagination. Teachers College Press.
McTaggart, R., Nixon, R., & Kemmis, S. (2017). Critical participatory action research. In L. L. Rowell (Ed.), The Palgrave international handbook of action research (pp. 21-35). Springer. https://doi.org/10.1057/978-1-137-40523-4_2
Torre, M. E. (2009). PAR-Map [PDF file]. Retrieved from https://actionresearch.mit.edu/sites/default/files/documents/PAR-Map.pdf
PAR Cov Keeb Kwm
PAR lub hauv paus taug tsis tau mus rau ib caj ceg xwb vim hais tias PAR tshwm sim los ntawm ob peb txoj kev xav kev kawm, xws li los ntawm kev kawm ntawv, kev ua hauj lwm hauv zej zog, kev noj qab haus huv, thiab kev ncaj ncees. Txhuam txhia qhov chaw thoob plaws ntiaj teb kuj taus tsim PAR ib nyuag txawv me ntsis thiab. Raws li tus kws tshawb fawb Fine thiab Torre sau tseg, hauv txhua qhov chaw no,
“PAR tau loj hlob tshwm sim tawm los ntawm zej zog kev coj ua thiab kev paub. Cov neeg zej zog es luag yeej ib txwm saib tsis muaj nuj nqis tau pom thiab tau paub hais tias tej kev xav es txhawb kev tshawb fawb tsis ncaj ncees. Tsis tas li ntawd xwb cov kev xav no tseem txhawb tej kev cuam tshuam thiab” (2004, p. 18).
Muaj ob caj ceg tseem ceeb tshwj xeeb rau PAR: ib caj ceg los ntawm tus kws tshawb fawb txog lub hlwb thiab kev xav hu ua Kurt Lewin thiab nws cov hauj lwm tshawb fawb txog “action research.” Hos ib caj ceg yog los ntawm tus xib fwb Paulo Freire thiab nws cov hauj lwm tawm tsam nyob rau nram Latin America. Tam sim no, cov neeg tshawb fawb es siv PAR tseem tab tom hloov lub moj khaum no kom tig mus rau “decolonizing theories.” “Decolonizing theories” yog ib yam kev xav thiab kev tshawb fawb es tshem cov teb chaws kav lwm hais neeg tawm kom cov neeg ntawd muaj kev thaj yeeb.
Fine, M., & Torre, M. E. (2004). Re-membering exclusions: Participatory action research in public institutions. Qualitative Research in Psychology, 1(1), 15–37. https://doi.org/10.1191/1478088704qp003oa
Zeller-Berkman, S. M. (2014). Lineages: A past, present, and future of participatory action research. In P. Leavy (Ed.), The Oxford handbook of qualitative research (pp. 518–532). Oxford University Press.
Kurt Lewin
“Yog hais tias yus xav paub ib yam dab tsi tiag tiag yus yuav tsum tau mus pauv yam khoom ntawd.”
Kurt Lewin yog ib tug neeg Jewish khiav teb khiav chaw tawm Nazi Germany, tuaj poob rau teb chaws Meskas thaum xyoo 1930. Lewin yog ib tug tub mloog thiab hwm Marxism. Nws xav kawm txog kev tsis ncaj ncees rau cov neeg Jewish, thiab nws xav kawm txog kev uas lwm haiv neeg kav nws haiv neeg. Ces nws pib kawm tshawb fawb txog neeg pab pawg kev sib coj ua, kev sib haum xeeb, kev sib koom tes. Txoj kev kawm no los yeej mus tshuam rau cov haiv neeg es tsawg tsawg txoj kev xav kev coj thiab. Thaum nws nkag siab zoo zoo lawm, Lewin yeej mob siab siv txoj kev tshawb fawb no los cuam tshuam kev hloov pauv ntiaj teb. Nws yog ib tug tswv cuab ntawm pab neeg “Commission on Community Interrelations (CCI)” es tsim xyoo 1945 los ntawm lub koom haum American Jewish Congress. Lewin txhawb thiab ntshaw hais tias kev tshawb fawb txog neeg zej zog yuav ncav mus txog cov zos nyob ib ncig tsev kawm ntawv qib siab (Cherry & Borshuk, 1998). Lewin muaj ib lub tswv yim hais tias “tag nrho txhua leej txhua tus nyob hauv ntiaj teb yuav tsum pab hloov cov xwm txheej uas tsim cov teeb meem es tshwm sim rau tej pab pawg neeg es tsawg tsawg” (Zeller-Berkman, 2014). Tshwj xeeb tshaj, nws tau sau tias, “Ob peb xyoos tas los no peb pib to taub hais tias tej yam es tib neeg hu ua pab pawg neeg tsawg teeb meem, qhov tseeb cov teeb meem no yog sawv daws li teeb meem. Thiab qhov teeb meem es neeg phej hu ua teeb meem Mes Kas Dub no yog neeg dawb qhov teeb meem xwb. Thiab qhov teeb meem es txhua tus pheej hais tias yog neeg Jewish qhov teeb meem xwb, qhov tseeb yog sawv daws li teeb meem. Mus li no.” (Lewin, 1946, p. 44)
Lewin yog tus uas tsim lo lus “action research” no los tham txog txoj kev kawm tshawb fawb es nthuav txog teeb meem kev sib raug zoo thiab lub hom phiaj los hloov cov teeb meem no. Nws lub zeem muag nrog rau “action research” thiab PAR yog kom txhua tus rau saib ntso xav ntawm tus kheej txog kev tshawb fawb, kev nqis tes ua, thiab kev ntsuam xyuas, ua ke nrog rau ntiaj teb cov neeg raug tsim txom thiab cov neeg txom nyem (Torre, 2014; Cherry & Borshuk, 1998; Zeller-Berkman, 2014). Lewin tau sau tias, “Kev nrhiav qhov tseeb yuav tsum suav txhua txhua yam hauv zej zog lub neej, tsis hais kev lag luam nrog rau kev ua nom ua tswv los sis kev coj noj coj ua. Nws yuav tsum suav nrog cov neeg feem coob thiab cov haiv neeg tsawg, cov neeg uas tsis yog Jewish thiab cov neeg es yog Jewish” (Cherry & Borshuk, 1998, p. 126).
Cherry, F., & Borshuk, C. (1998). Social action research and the Commission on Community Interrelations. The Journal of Social Issues, 54(1), 119–142. https://doi.org/10.1111/j.1540-4560.1998.tb01210.x
Greenwood, D. J., & Levin, M. (1998). Introduction to action research: Social research for social change. Sage Publications, Inc.
Lewin, K. (1946). Action research and minority problems. The Journal of Social Issues, 2(4), 34–46. https://doi.org/10.1111/j.1540-4560.1946.tb02295.x
Torre, M. E. (2014). Participatory action research. In T. Teo (Ed.), Encyclopedia of critical psychology. Springer. https://doi.org/10.1007/978-1-4614-5583-7_211
Zeller-Berkman, S. M. (2014). Lineages: A past, present, and future of participatory action research. In P. Leavy (Ed.), The Oxford handbook of qualitative research (pp. 518–532). Oxford University Press.
Paulo Freire
Kev xav txog PAR nram Latin America yog los ntawm Paulo Freire es yog ib tug neeg tawm suab txog kev qhia ntawv thiab yog ib tug xib fwb qhia ntawv nrov heev. Thiab los ntawm Orlando Fals Borda uas yog ib tug kws tshawb fawb uas yog Colombian. Nws tshawb fawb txog tib neeg lub neej thiab kev ua neej nyob ntiaj teb.
Raws li Zeller-Berkman (2014) sau tseg, thaum lub caij 1960s mus rau 1970s, cov teb chaws nyob rau nram Latin America tau muaj kev tsis ncaj ncees thiab kev sib dag zog. Vim li no cov kws tshawb fawb hauv Latin America thiaj li los txhim kho cov txheej txheem tshawb fawb. Nyob ntawm PAR caj ceg, lub luag hauj lwm ntawm tus kws tshawb fawb yog los ua tus “animator,” los sis tus neeg uas pab txhawb kev hloov pauv ntawm kev paub hauv zej zog. Lub hom phiaj yog xav kom cov kws tshawb fawb hauv zej zog tau kawm kom paub tshawb fawb txaus. Thaum paub txaus lawm, kom lawv siv tau cov kev tshawb fawb los koom tes tshawb fawb nrog cov neeg es nyob rau hauv lawv lub nroog ib ncig, kom lawv tsim tau kev paub, thiab kom lawv txhim kho lawv cov kev daws teeb meem lawv tus kheej. Tiag tiag mas xav kom lawv ua tau tag nrho cov hauj lwm sab nraum tsev kawm ntawv qib siab. Ces lub hauv paus ntawm PAR yeej yog kev tsim kom neeg zej zog muaj peev xwm thiab muaj kev txhim kho lawm lub zos los yog lawv lub nroog; Fals Borda hu qhov kev sib koom tes tshawb fawb no hu ua “neeg txoj kev tshawb fawb” (Fals Borda, 1977).
PAR lub hauv paus los ntawm Paulo Freire cov tswv yim qhia ntawv thiab nws kev xav txog neeg kev sawv tawm tsam (Torre, 2014). Freire tau tawm tswv yim kom tsoom fwv pej xeem khiav kev kawm ntaub kawm ntawv thiab kom tsoom fwv pej xeem khiav kev tshawb fawb. Li no es neeg pej xeem thiab neeg zej zog thiaj li tau sib koom tes tsim cov kev paub txog lawv tus kheej. Tsis tam li ntawd los xav kom lawv thiaj li muaj kev sib raug zoo hauv zej zog uas qhov kev txawj ntse hauv zej zog tau muaj nuj nqis sib npaum nkaum kev txawj ntse hauv tsev kawm ntawv qib siab thiab. Lub ntsiab lus tseem ceeb hauv Freire txoj kev xav kev ua hauj lwm yog nws lub tswv yim hu ua “conscientização.” Nov yog Freire lub tswv yim uas nrov tshaj plaws. Lub tswv yim txhais tau hais tias xav pab kom txhua txhia tus tib neeg nkag siab zoo txog nws lub neej muaj thiab lub neej pluag, txog nws kev muaj hwj chim thiab kev muaj zog tawm tsam. Freire ntseeg tau hais tias yog yus xav paub txog tej no tiag tiag ces yus paub tshawb nrhiav, paub xav kom tob tob, thiab paub nqis tes ua (Torre, 2014; Zeller-Berkman, 2014).
Fals Borda, O. (1977). Por la praxis: El problema de cómo investigar la realidad para transformarla. In O. Fals Borda (Ed.), Crítica y política en ciencias sociales. Punta de Lanza.
Rahman, M. (1991). The theoretical standpoint of PAR. In O. Fals Borda & M. Rahman, Action and knowledge: Breaking the monopoly with participatory action research (pp. 13–24). Apex Press.
Torre, M. E. (2014). Participatory action research. In T. Teo (Ed.), Encyclopedia of critical psychology. Springer. https://doi.org/10.1007/978-1-4614-5583-7_211
Zeller-Berkman, S. M. (2014). Lineages: A past, present, and future of participatory action research. In P. Leavy (Ed.), The Oxford handbook of qualitative research (pp. 518–532). Oxford University Press.
Gloria Anzaldúa
Ob peb hnub no, cov kws tshawb fawb txog poj niam lub neej tau rov kho PAR kom tig rov los siv lub hauv paus qub. Lub hauv paus qub muaj ib lub hom phiaj xav kom daws tso pej xeem los ntawd cov teb chaws uas kav lawv. Vim hais tias cov kws tshawb fawb no muaj kev ceev faj tsam cov neeg muaj hwj chim cuam tshuam (Fine, 2009; Torre, 2014), lawv thiaj li muab PAR lub hom phiaj txuas rau queer, feminist, Marxist, thiab Indigenous kev xav thiab kev tshawb fawb (Torre, 2014; Torre et al., 2012).
Qee cov kws tshawb fawb tau muab PAR txuas nrog Gloria Anzaldúa cov kev xav uas nws tau sau tseg rau hauv nws phau ntawv Borderlands/La Frontera: The New Mestiza (Anzaldúa, 1987). Cov ntseeg li no tawm tswv yim kom PAR txais qhov es Anzaldúa hu ua “mestizaje” thiab txais kev tsis sib haum xeeb (los sis choques), kom sawv daws tsis txhob muab kev pom zoo saib hlob (Torre & Ayala, 2009, p. 390). Cov kws tshawb fawb no tau hais tias txawm yog pab pawg tshawb fawb uas siv PAR los “cov kws tshawb fawb nyias yeej muaj nyias kev nyiam, nyias yeej muaj nyias ib lub hom phiaj sib txawv los ntawm nyias cov kev pab thiab los ntawm tus muaj.” Yam es nyias txawv nyias li no yog ib qho zoo heev rau kev tsim kev paub, vim tias qhov nyias txawm nyias no qhia peb txog cov teeb meem es nyob rau ntiaj teb (Torre & Ayala, 2009, p. 388).
Ib qho ntxiv yog cov kws tshawb fawb es siv PAR muab cov poj niam es tsis yog neeg tawv dawb kev ua neej thiab kev xav los xam kom tseem ceeb me ntsis. Cov kws tshawb fawb no xav taw qhia tias “mestiza consciousness muaj ntau yam, muaj kev sib txuas, kev tsis sib haum xeeb thiab kev sib koom tes ua ke rau hauv cov poj niam no lub cev… Txoj kev xav no ntseeg tau hais tias kev paub thiab kev txawj ntse nyob rau hauv lub cev nqaij daim tawv. Yog li no yuav tsum xam cov poj niam es tsis yog tawv dawb lub neej kom muaj nuj nqis rau txoj kev kawm” (Ayala, 2009, p. 72).
(Cov lus no los ntawm Linda Tuhiwai Smith, ib tug kws tshawb fawb uas yog neeg Maori, sau rau hauv nws phau ntawv Decolonizing Methodologies: Research and Indigenous Peoples, p. 10)
Anzaldúa, G. E. (1987). Borderlands/La frontera: The new mestiza. Aunt Lute Books.
Ayala, J. (2009). Split scenes, converging visions: The ethical terrains where PAR and Borderlands scholarship meet. The Urban Review, 41, 66–84. https://doi.org/10.1007/s11256-008-0095-9
Fine, M. (2009). Postcards from Metro America: Reflections on youth participatory action research for urban justice. The Urban Review, 41, 1–6. https://doi.org/10.1007/s11256-008-0099-5
Torre, M. E. (2014). Participatory action research. In T. Teo (Ed.), Encyclopedia of critical psychology. Springer. https://doi.org/10.1007/978-1-4614-5583-7_211
Torre, M. E., & Ayala, J. (2009). Envisioning participatory action research entremundos. Feminism & Psychology, 19(3), 387–393. https://doi.org/10.1177/0959353509105630
Torre, M. E., Fine, M., Stoudt, B., & Fox, M. (2012). Critical participatory action research as public science. In P. Camic & H. Cooper (Eds.), The handbook of qualitative research in psychology: Expanding perspectives in methodology and design (2nd ed., pp. 171–184). American Psychological Association. https://doi.org/10.1037/13620-011
Tej Hom PAR Feem Ntau
Feem ntau, cov hauj lwm es siv PAR zoo sib xis, xws li cov uas khiav hauj lwm yog cov neeg zej zog es raug cuam tshuam los ntawm kev tshawb fawb. Cov hauj lwm no siv kev ncaj ncees thiab kev sib koom thoob plaws vim hais tias lawv xav hwm ntau hom kev paub. Tsis tas li ntawd los cov hauj lwm no xav siv tej yam kev txawj ntse no los pauv neeg lu neej nyob hauv tej chaws kom zoo mus. Txawm li no los cov hauj lwm nyias yeej txawv nyias thiab.
Qhov zoo mas yuav tsum piav qhia seb cov hauj lwm es siv PAR no ho sib txaws li cas. Ntawm no yog plaub hom PAR:
PAR Kev Ncaj Ncees
Nyob rau hauv cov hauj lwm tshawb fawb, tsis hais cov hauj lwm uas siv PAR los tsis siv PAR, kev coj ncaj ncees yog qhov tseem ceeb tshaj plaws.
Muaj ntau txoj hauv kev los xav txog kev coj ncaj ncees:
- Feem ntau yeej muaj kev cai kav cov kws tshawb fawb kom lawv xav txog kev noj qab haus huv ntawm cov neeg uas koom nrog lawv. Yeej muaj tej pab pawg es taug qab cov kev cai no. Feem ntau lawv yog ib ceg nyob rau hauv tsev kawm ntawv qib siab. Lawv muaj lub npe lus Askiv hu ua “institutional review boards” los sis “IRB.”
Watch this video to learn about how IRBs protect human research participants
- Kuj tseem muaj tej pab pawg xws li Bronx Community Research Review Board (BxCRRB) uas nyob hauv zej zog es saib xyuas kev tshawb fawb kom coj ncaj ncees:
The Bronx Community Research Review Board (BxCRRB)
BxCRRB tawm suab kom txhua tus neeg hauv zej zog muaj lub suab thiab kom luag mloog thaum lawv hais lus. Yog tsim los kom muaj kev saib xyuas tiv thaiv cov neeg zej zog nyob rau hauv Bronx kom lawv thiaj li tsis raug kev tsim txom, xws li kom tsis pub dag txog tej yam teeb meem loj es yuav tshwm sim los ntawm txoj kev tshawb fawb, los sis kom tsis pub ua txhaum txoj cai ua tib neeg. Txoj kev tshuaj xyuas no kuj pab qhuab qhia cov kws tshawb fawb txog kev koom tes nrog zej zog, qhia lawv khiav hauj lwm kom ncaj rau zej zog kab lis kev caij thiab kev coj noj coj ua.
- Cov kev coj ncaj ncees pab kws tshawb fawb txiav txim siab txog lawv cov lus nug, cov txheej txheem, thiab txhua yam hauj lwm es hais txog lawv lub hom phiaj tshawb fawb.
- Muaj cov kev coj ncaj ncees es pab qhia txog kws tshawb fawb kev coj txhua txhua hnub uas lawv ua hauj lwm nrog tib neeg.
- Tsis tas li ntawd, hais txog cov kev cai, yuav tsum muaj “kev hwm kev saib taus tib neeg, kev ua zoo, thiab kev ncaj ncees.” Qhov no yog los ntawm ib cov kev ncaj ncees hu ua “The Belmont Report”:
- Tej yam hauj lwm tshawb fawb es siv PAR feem ntau koom nrog cov haiv neeg uas muaj keeb kwm tsis zoo thiab raug tsim txom. Yog vim li no yuav tsum tshuaj xyuas thiab paub txog tej yam kev tsis ncaj ncees hauv tebchaws Meskas es tau tshwm sim nrog kev tshawb fawb kho mob. Cov neeg uas tsis yog tawv nqaij xim dawb yog cov es raug txoj kev tsis ncaj ncees. Qhov nov yog ib qho uas tseem ceeb heev rau peb lub hom phiaj nkag siab txog kev coj ncaj ncees.
Cia peb muab ob yam kev coj tsis ncaj ncees los nthuav saib. Ob yam no tshwm sim thaum kws tshawb fawb khiav txoj hauj lwm tshawb fawb hu ua “Tuskegee Experiment”:
Ib zaug tshwm sim xyoo 1932 mus txog rau xyoo 1972. Lub sij hawm no, cov kws tshawb fawb uas ua hauj lwm rau teb chaws Meskas lub koom haum tshawb fawb txog kev noj qab haus huv koom tes nrog ib lub koom haum hu ua Tuskegee. Lawv mus tshawb fawb txog kev mob kas cees nrog rau cov neeg Meskas dub rau hauv lub xeev Alabama. Lawv ntxias tau 600 tus txiv neej koom nrog lawv. 399 tus mob kas cees hos 201 tug tsis mob. Qhov tsis ncaj ncees yog cov kws tshawb fawb tsis qhia 399 tus txiv neej es mob kas cees no hais tias lawv muaj qhov mob no. Tsis tas li ntawd los, lawv tsis pab tshuaj thiab. Yog vim lis no, 128 tus txiv neej tau tag sim neej vim qhov mob no.
(Yog xav paub ntxiv txog qhov Tuskegee Experiment, mus nyeem ntxiv hauv daim ntawv no: Reverby, S. M. (Ed.). (2012). Tuskegee’s truths: Rethinking the Tuskegee syphilis study. UNC Press Books.)
Ib zaug tshwm sim xyoo 1951 nrog ib tug pom niam hu ua Henrietta Lacks. Lub sij hawm no, Henrietta mob kheeb xawm los sis “cancer” rau hauv nws lub ncauj tsev me nyuam. Thaum nws mus tom tsev kho mob, kws kho mob tau tshem nws ib co roj ntsha nqaij mus siv ua tshuaj tau 60 tawm xyoo, zais tsis qhia nws los nws tsev neeg li. Henrietta tau tag sim neej tom lub tsev kho mob.
(Yog xav paub ntxiv txog Henrietta Lacks, mus nyeem ntxiv hauv phau ntawv no: The immortal life of Henrietta Lacks. Broadway Paperbacks.)
- Tej zaum cov kws tshawb fawb es siv PAR yuav tsum muab cov lus nug hauv qab no ua zoo xav: Koj yuav ua li cas kom koj thiaj li taug txoj kev ncaj ncees thaum koj khiav hauj lwm tshawb fawb? Qhov tseem ceej tshaj plaws yog thaum koj muaj ib txoj kev tshawb fawb nrog rau neeg zej zog (xws li kev hwm, kev sib luag thiab kev suav nrog, kev koom nrog kev ywj pheej, kev sib koom ua ke, mus rau lwm yam)?
- Yog xav paub ntxiv hais tias kev coj ncaj ncees zoo li cas dhau ntawm daim ntawv tso cai, mus saib pag no hauj lwm tshawb fawb nrog cov hluas es yog LGBT nyob rau hauv teb chaws United Kingdom.
Peb txoj hauj lwm tshawb fawb tom Carleton-Faribault muaj ob peb pab neeg tshawb fawb hauv zej zog. Lawv yeej tau tshawb nrhiav txog kev coj ncaj ncees:
Kev tshawb nrhiav ntxiv:
- “A Guide to Ethical Principles and Practice.” Nphau ntawv no yog qhov chaw Social Justice and Community Action tom Durham University pab tsa tawm los, hos tus luam tawm los yog National Coordinating Center for Public Engagement.
- Kev nthuav qhia ntawm “Tackling Ethical Challenges in Community-Based Participatory Research” los ntawm Sarah Banks tom Durham University.
- Daim ntawv no yog Katie Johnston-Goodstar thiab Jenna Sethi tsim los pab xav tob txog kev coj ncaj ncees thaum khiav cov hauj lwm tshawb fawb es siv PAR.
